على تويتر على الفيسبوك الخلاصات

أنت الان على ( بوابة الطالب المصري ) نحن سعداء بتواجدك معنا ..و نتمنى لك قضاء وقت ممتع :)

وظائف خريج كلية العلوم..لما اتخرج هاشتغل اييه؟؟!!ا


بسم الله الرحمن الرحيم
 مرحب بكل طلاب كلية العلوم الكلية اللي مهضوم حقها في مصر :(  بس ان شاء الله انا ملاحظ تطور ملحوظ في اداء كليات العلوم واهتمام افضل من المجتمع ونظرة مختلفة شوية عن الاول .يعني ان شاء الله كلية العلوم هاتكون كلية القمة الاولى في خلال سنوات قليلة ان شاء الله



نرجع بقى لموضوعنا ان شاء الله هو انت شاغل نفسك اوي هاتشتغل ايه لما تتخرج من كلية العلوم ليه كده
انا ملاحظ ان الطلاب الجداد اللي داخلين الكلية عبارة عن مستثمرين اهم حاجة الفلوس وهاشتغل ايه ..يعني تخيل طالب زي ده قعد يذاكر في الثانوية وطلع عينه وهدفه هو انه يشتغل بس وعايز فلوس بس ..لو كده بقى انت كان ممكن متذاكرش وتتعلم اصلا وتروح تشوفلك شغلانة تجيب فلوس افضل ما تتعب نفسك وتخش كليات وقرف ومذاكرة تاني
ياريت النظرة دي تتغير بقى ,المفروض انا بذاكر واتعلم مش علشان الفلوس بس ,الفلوس هاتيجي هاتيجي لكن خليها هي اللي تجيلك مش انت اللي تجري عليها,احنا بنذاكر وندخل احسن الكليات علشان نتعلم ,تعرف ان معظم العلماء لا يملكون المال ولكنهم يمكلكون علما لا يشترى بمال الدنيا ,العلم في حد ذاته غاية نبيلة وليست وسيلة لكسب المال مع ان المال هايجي لغاية عندك يا سيدي ما تقلقش انا قصدي ان انت تغير نيتك وانت بتدرس  علشان ربنا يكرمك ويوفقك يعني مثلا انا بدرس علشان ديننا يحثنا على طلب العلم وعلشان كمان اتعلم علم انفع بيه الاسلام وبلدي وعلشان انقل العلم ده وابلغه للناس وعلشان حاجه اخيرة هي مش مهمة اوي ان يكون مصدر رزق ليا اقدر اعيش من خلاله واكفي اسرتي واتجوز واعف نفسي وانفق الاموال دي في خدمة الدين
تخيل نية زي دي ممكن اخد عليها اجر قد ايييه وتخيل بقى توفيق ربنا هايكون عامل ازاااي يااااااه شعور جميييل 
 قال رسول الله صلى الله عليه وسلم يقول : " من سلك طريقا يبتغي فيه علما سلك الله به طريقا إلى الجنة ، وإن الملائكة    لتضع أجنحتها رضاء لطالب العلم ، وإن العالم ليستغفر له من في السموات ومن في الأرض ، حتى الحيتان في الماء ، وفضل العالم على العابد كفضل القمر على سائر الكواكب ، إن العلماء ورثة الأنبياء ، إنَّ الأنبياء لم يورثوا دينارا ولا درهما ، إنما ورثوا العلم فمن أخذ به أخذ بحظ وافر "[ أخرجه الترمذي (2682)] . 
تخيل بقى كمان لو مع العلم اللي انت بتتعلمه في كلية العلوم علم شرعي ده يبقى انت كده في التمااام اوي
خلاص كده خلصت المقدمة انا كان قصدي منها ان احنا نغير من نظرتنا للامور شوية ونحاول نفهم الدنيا كويس الحكاية مش حكاية لما هاتخرج هاشتغل ايه واخد كام حاول تكبر نفسك شوية ..الحكاية مش حكاية فلوس في حاجات اهم بكتير تخيل مثلا طالب في كلية العلوم درس اربع سنين بجد واجتهاد وطلع الاول على دفعته وجاتله وظيفة في شركة كبيرة ب 6 الاف جنيه في الشهر وراح اشتغل وفي نهاية الشهر الاول وقبل ما يقبض المرتب مات :( والله العظيم بتحصل كتير لسه ميت زميل لينا السنة دي نجح في سنة تاتة
ورايح الفرقة الرابعة لكن للاسف منتقلش الفرقة الرابعة انتقل لمكان تاني ..اسأل الله ان يغفر له ويرحمه
من الاخر فوق وغير من نفسك وعيش صح بقى 

نرجع للموضوع اللي لسه شاغل بالكم كلية العلوم بتقدم بكالوريوس في تخصصات عديدم من خلال التخصص بتاعك تقدر تشتغل وظيفة تناسبك
انا نقلت الكلام اللي تحت ده من واحد كاتبه ربنا يجازيه خير
 
اولا اي بكالوريوس علوم فيها كلمه كيمياء فهي تشير للكيميائيين وهم اكبر فئه موجوده في كلية علوم و يختلف الكيميائيين في عملهم علي حسب تخصصاتهم في مجالات العلوم الطية والعلوم الصناعيه التطبيقيه والابحاث
ماهي بكالوريوسات الكيمياء في كليه العلوم

1- بكالوريوس كيمياء سبيشيل اي كيمياء فقط
2- بكالوريوس كيمياء صناعيه وتطبيقيه 
3- بكالوريوس كيمياء بيئيه
4- بكالوريوس كيمياء حيوية او كيمياءحيوية طبية
5- بكالوريس كيمياء وميكروبيولوجي
6- بكالوريوس كيمياءحيوي وميكروبيولوجي
7- بكالوريوس كيمياء وحيوان
8- بكالوريوس كيمياء ونبات
9- بكالوريوس كيمياء وحشرات
10- بكالوريوس كيمياء وفزياء
11- بكالوريوس كيمياء وجيولوجيا (جيوكيميا)
12- بكالوريوس كيمياء وكيمياءحيوية
13-بكالوريوس كيمياء شرعيه وسموم
14-بكالوريوس كيمياء طبية 
*ملحوظة:بعض البكالورريوسات لا تقدمها جامعات وبعضها يقدما جامعات اخرى
كل دي بكالوريوسات كيمياء في كليات العلوم 
الفرق بين الكيمياء فقط والكيمياء مزدوج
البكالوريوس المزدوج معمول عشان يوفر فرص عمل اكتر فبدل من ان تحصل علي بكالوريوس في تخصص واحد فقط فتحصل علي بكالوريوس فيه تخصصيين وده بيتيح انك ممكن تشتغل في المجاليين اي مجال الكيميا او المجال الاخر 

طب نرجع لموضوعنا تاني ادام في البكالوريوس بتاعك كلمه كيمياء يبقي انت ممكن يطلق عليك كيميائي chemist
ماهو المسمي الوظيفي للكيميائيين وان شاء الله هكتب المسمي بالعربي والانجليزي 
فمثلا هناك 
( applied chemist) or ( industrial chemist )
اي كيميائي تطبيقي ...... وده يعني كيميائي بيشتغل في التصنيع الكيميائي في المصانع اي في التصنيع زي تصنيع وتخليق الادوية و مستحضرات التجميل و البلاستك والاصباغ والورق والمبيدات الحشرية و الاغذية عنما يشتغل في تصنيع الادوية المنتجات الطبيه يطلق عليه كيميائي تطبيقي طبي ده تابع لوزاره الصناعه
forensic chemist 
اي كيميائي شرعي ....... وده اخصائي كيمياء الشرعيه وسموم اي في التحاليل الجنائيه والتزوير والتزيف والبصمه الوراثيه وكل التحاليل اللي بتدلل الشرطه ع الجرايم وده تابع لوزاره العدل ويفضل ان يكون معه دبلومه كيمياء شرعيه 
analytical chemist 
اي كيميائي تحليلي ......... وهو كيميائي يختلف عن الكيميائي التطبيقي او الكيميائي الشرعي والكيميائي التحليلي بيشتغل في تحليل المنتجات في المصانع والشركات زي مثلا نه يحلل نسب العناصر للي موجوده في المنتج سواء كان المنتج ده اادوية او مستحضرات تجميل او مية او بترول
( clinical biochemist)(clinical chemist
اي كيميائي طبي اكلنيكي( اخصائي تحاليل طبيه كيميائيه )............ اي كيميائي متخصص في كيمياء الدم وتحاليلها زي كيمياءو انزيمات الكبد و كيمياء وانزيمات الكلي وكيمياء وانزيمات القلب وكيمياء المخ والاعصاب والسكر والدهون وكيمياء ودلالات الاورام وبيولوجيا السرطان وكيمياء المناعه والهرمونات والسموم وكيمياء المخدرات وكيماء البول وكل التحاليل الكيميائيه الطبية وده تابع لوزاره الصحه
research chemist
اي كيميائي باحث في البحث لعلمي ....... وده بيشتغل في الابحاث العلميه ومراكز البحوث وده تابع لوزاره البحث العلمي
pharmaceutical chemist) or(medicinal chemist ) 
كيميائي طبي ولكنه غير اكلنيكي ( اكلينك يعني ليها علاقه بالمستشفيات ) اما ده كيميائي بيستخدم الكيمياء في تطوير وصناعه الادوية وهو هو الكيميائي التطبيقي الطبي 
geochemist
اي الكيميائي المتخصص في تحاليل كيمياء البترول والتحاليل الجيولوجيا الخاصه بالتربة ويعمل في معامل التكرير في شركات البترول
chemistry teacher
اي مدرس كيمياء ويختلف التدريس فقد يعمل الكيميائي كمدرس للثانوي او للاعدادي وده معناه ان تاع لوزاره التربية والتعليم
وقد يعمل الكيميائي كمدرس جامعي في كليات العلوم او الصيدله او الطب الخ علي حسب تخصصه
وهناك من يعمل كاساتذه في كليات العلوم والصيدله والطب في دول اوربا زي انجلترا والمانيا واسكتلندا الخ

ثانيا اي بكالوريوس علوم فيه ميكروبيولوجي ( اي يدرس بالبكتريا والفطريات والفيروسات والطحالب والمناعه)
و ادام في البكالوريوس بتاعك كلمهميكروبيولوجي يبقي انت ممكن يطلق عليك كيميائي microbiologist اي ميكروبيولوجيست او اخصائي ميكروبيولجي
ماهو المسمي الوظيفي للاخصائي الميكروبيولوجي

clinical microbiologist and immunologist 
اي اخصائي الميكروبيولوجيا الطبية والمناعه ( اخصائي تحاليل طبية ميكروبيولوجيه ومناعيه ) وده وظيفته في التعرف علي انواع البكتريا والفطريات والفيروسات في كل حته في الجسم عن طريق المزارع او الكيمياء او عن طريق البيولوجيا الجزيئيه او عن طريق المناعه وايضا يختص بالمناعه و يقوم بعمل التحاليل المناعيه المختلفه
pharmaceutical microbiologist
اخصائي ميكروبيولوجيا تطبيقيه دوائيه ( اخصائي الميكربيولوجيا الصيدلانية) .. ............... وده وظيفته انه بيستخرج ويصنع ادوية من البكتريا والفطريات والفيروسات والطحالب و وايضا بيعمل ادوية ضد البكتريا والفيروسات والفطريات
والميكروبيولوجيا الصيدلانية هو فرع من فروع الميكروبيولوجيا التطبيقيه يهتم باكتشاف ادوية جديده عن طريق البكتريا والفطريات والطحالب و الفيروسات 
اخصائي الميكروبيولوجي الصيدلانية يتطلب بكالوريوس علوم ميكروبيولوجي ويعمل في شركات ومصانع الادوية في اقسام الميكروبيولوجي ومعامل الابحاث ومراكز البحوث او يعمل في ا لمجال الاكاديمي في التدريس الجامعي في كليات العلوم او الصيدله 
industrial microbiologist or applied microbiologist
اي اخصائي الميكروبيولوجيا التطبقيه .......... وده وظيفيته انه يعمل تحليل للمية من البكتريا والفطريات والفيروسات ويعمل تحاليل للاغذية والسوائل من البكتريا والفطريات والفيروسات
وبكالوريوس علوم ميكروبيولوجي من الممكن ان يفتح معمل تحاليل خاص بالميكروبيولوجيا الطبية الاكلنيكية اي بتحاليل البكتريا والفطريات والفيروسات و ا لمناعه لكن يجيب ان يكون بكالوريوس مزدوج اضف لذالك مهنه التدريس للثانوي او للجامعات سواء كليات العلوم او الصيدله او الطب او طب لاسنان
ثالثا اي بكالوريوس حيواندرس كل ما يتعلق بالمملكه الحيوانيه وعلي رائسها الانسان فيدرس الفسيولوجى اي علم وظائف الاعضاء
والامبريولوجى اي علم الاجنه والهيماتولوجى اي علم امراض الدم والسيريولوجى اي علم المناعه والباراسيتولوجى اي علم الطفيليات ايضا يدرس كيميا انسجه وكيمياءحيوية 
عند التخرج يسمي علي حسب الشغل والتخصص بتاعه ووممكن يتخصص في الاتي
immunologist
اي اخصائي مناعه( اخصائي تحاليل طبية مناعيه ).................. وده بيشتغل في تحاليل المناعه وايضا بيشتغل في اكتشاف ادوية جديده عن طريق المناعه زي مثلا انه يعمل دواء للسرطان عن طريق انه ينشط الجهاز المناعي فيقوم الجهاز المناعي ينشط ويهاجم السرطان وقد يدرس هذا العلم مع الميكروبيلجي او الكيمياء الحيوية
embryologistاخصائي اجنه و اطفال انابيب ....... وده بيشتغل في مراكز الاجنه و اطفال الانابيب ووهو دوره انه يلقح الحيوان المنوي بالبويضه علي اسس علميه وفي مناخ يسمح للتلقيح انه يحصل وبيشتغل في الابحاث الخاصه بالاجنه

molecular biologist

وه اخصائي بيولجيا جزيئيه اي مختص بتحاليل الدي ان ايه سواء للانسان عشان يتعرف ع مثلا تحاليل النسب او تحاليل الدي ان اية للبكتريا و الفيرسات والفطريات عشان يتعرف عليها

neurobiologist or neuro scientist
وهو اخصائي علم الاعصاب ويعمل في الابحاث الطبية الخاصه بالجهاز العصبي وبعلم الاعصاب بشكل عام و قد تم تاسيس هذا التخصص كماجستير في قسم علم الحيوان بكلية العلوم جامعه الاسكندرية العام الماضي بالتعاون مع جامعه بوردو بفرنسا 

Hematologist
وهو اخصائي علم الدم ويعمل كاخصائي تحاليل طبيه في علم امراض الدم زي الانيميا وزي اللوكيما
parasitologist

وهو اخصائي الطفيليات ويعمل كخصائي تحاليل طبية مختص بعلم الطفيليات زي الديدان وزي الاميبا وقد يدرس هذا العلم مع الميكروبيولوجي
رابعا علوم الحاسب
computer programmer or computer scientist 

مبرمج او اخصائي علوم حاسب في شركات علوم الحاسب او ممكن يشتغل في تدريس علوم حاسب في االثانوي او المعاهد او الجامعات

و للاسف مجال علم الحاسب مفتوح لاي حد بيشتغل فيه

ولكن حاليا بنحاول نعد مشروع قانون لمهن العلمية لمنع مزاوله مهن العلوم لاي شخص غير متخصص
الجيولجيين والجيووفزيائيين وخريجي علوم البترول الجيولجيه والغاز الطبيعي
geophysicist - geochemist- petroleum scientist 
المجال الأول جيولوجي بإحدى شركات البترول
المجال الاول شركات البترول 
المجال الثاني جيولوجي بإحدى شركات التعدين
المجال الثالث هيئه المساحة الجيولوجية
المجال الرابع هيئه المواد النووية في وظيفة معيد
المجال الخامس هيئه الطاقة الذرية
المجال السادس مركز بحوث الفلك والجيوفيزياء
المجال السابع الهيئة العامة لاستشعار عن بعد وعلوم الفضاء
المجال الثامن شركات الاسمنت والمحاجر
المجال التاسع تدريس ا لجيولوجيا للثانوي او في الجامعات والمعاهد

Shimmaa Khaled تحديث للموضوع: بواسطة



 قسم البحته والاحصاء 
الشغل : يشتغل كاحصائي في الشركات والوزارات والقوات المسلحه والمصانع ومعامل الابحاث
قسم النبات
phyto chemistry  :الشغل في مراكز البحوث المختلفه والنباتات الطبيه وفي وزارة المياه وممكن يعمل بعد البكالوريوس دبلومه
ويشتغل في مجال النباتات الطبيه واستخدامها في الادويه كمان ممكن يشتغل في مجال زراعه الانسجه والهندسه الوراثيه
قسم الحيوان 
يدرس كل ما يتعلق بالمملكه الحيوانيه وعلي رأسها الانسان فيدرس الفسيولوجى اي علم وظائف الاعضاء والامبريولوجى اي علم الاجنه والهيماتولوجى اي علم امراض الدم والسيريولوجى اي علم المناعه والاناتومى اي علم التشريح والباراسيتولوجى اي علم الطفيليات
الشغل : ممكن يشتغل في التحاليل الطبيه اذا حضر دراسات عليا في الطفيليات او في الهيماتولوجى اي امراض الدم وممكن يشتغل في اطفال الانابيب اذا حضر دراسات عليا في علم الاجنه وممكن يشتغل في اي مركز من مراكز البحوث المختلفه وفي مجال حماية البيئه وفي الادويه والامصال وفي مجال علوم البحار والثروة السمكيه وفي وزارات المياه والزراعة والصحة
قسم البيو فيزيا
 هو تطبيق لمباديء الفيزياء وتقنياتها لدراسة تركيب ووظيفة الخلية الحية و دراسة للقوانين الفيزيائية التي تؤثر في الجزيئات الحيوية والعمليات الحيوية كما تهتم الفيزياء الحيوية بدراسة وظائف العين والاذن والاجزاء الاخرى من للجسم و كمان لها تطبيقات في الطب حيث توفر تفسيراً للعلاقات الوظيفية بين أجزاء الجسم و أيضا في دراسة نظام المناعة ضد الامراض و شغلها بره موجود في المعاهد الطبيه زي الاورام و كده و المستشفيات طبعا و معاهد علوم الليزر و بحوث الاشعاع و البحوث النوويه
قسم الفيزيا الاسبيشيل
بيبقي شامل كل حاجة عن الفيزيا وهو قسم من اقسام العباقرة ودراسته فيزيا كهربيه و حراريه و الفيزيا النووية و فيزيا الجوامد و الجسيمات الرقيقه و اليزر و حدث ولا حرج اكيد انتو عارفين و شغله بقي في معامل الابحاث و العمل بالمفاعلات وهيئة الطاقة الذرية ومركز الليزر و في مصانع الاجهزه الكهربيه

اقسام لا توجد الا في كلية العلوم جامعة القاهرة
 رياضه / فلك 
: بدرس مواد رياضه و مواد فلك وله الحق في اخذ الصفتين و شغله في مصر في مرصد حلوان والمراكز البحثيه الفلكيه
 فلك منفرد
 :الشغل في مرصد حلوان والمراكز البحثيه الفلكيه

قسم علوم الفضاء 
:الشغل في المراكز البحثيه المختلفه مثل مراقبه الطقس الفضائي وهيئة الارصاد الجويه والمركز القومي للبحوث والمراكز البحثيه الفلكيه
 فيزيا / علوم جويه 
: الشغل في مرصد حلوان بالاضافه لشغل الفيزيا والمراكز البحثيه الفلكيه
 فيزيا اتصالات
 : القسم ده مش موجود في مصر كلها غير في جامعه القاهره المفروض المفروض انه قسم رااااااااااااائع بس للاسف البكارليوس بتاعه ناقص و بيحتاج خريج القسم انه ياخد دبلومه فيزيا اتصالات و هي مش متوفره و صعب توفيرها كمان و شغله بقي هيبقي في معامل الابحاث
بس خلاص خلص الموضوع ...اتمنى تكون استفدت حاجه واخدت قرار وعيرت نيتك علشان تاخد ثواب على كل علم بتتعلمه في الكلية وميروحش على الفاضي 
:)
 طلاب اسرة الفردوس-علوم عين شمس
صفحة الاسرة على الفيس بوك
https://www.facebook.com/alferdaws.family

_____________________________________________ اذا اردت التعليق فقد تم فتح التعليق بدون
تسجيل في البوابة ...يسعدنا رأيك سبحان الله وبحمده سبحان الله العظيم

تحرير الرسالة…

التسميات | , , , , ,

تعليقان على | وظائف خريج كلية العلوم..لما اتخرج هاشتغل اييه؟؟!!ا |

هل تريد التعليق بدون استخدام الفيسبوك؟

...يمكنك التعليق بدون تسجيل

اخر التعليقات

اخر المواضيع

ابعت لينا اي رسالة

الاسم

بريد إلكتروني *

رسالة *